საქართველოს უნივერსიტეტში გაიმართა სტუდენტური კონფერენცია თემაზე „მეწარმეობა და ტურიზმი“

3 ივნისს საქართველოს უნივერსიტეტში გაიმართა სტუდენტური კონფერენცია თემაზე „მეწარმეობა და ტურიზმი“.

კონფერენციაში მონაწილეობდნენ კავკასიის საერთაშორისო უნივერსიტეტის ტურიზმის სპეციალობის სტუდენტები მარი ლუკავა და დავით დოღონაძე. მათ თემაში „ინოვაციური სერვისები სასტუმრო ინდუსტრიაში“ (ხელმძღვანელი: CIU-ს ასოცირებული პროფესორი ლალი მიქელაძე) წარმოდგენილი იყო სასტუმროს ფსიქოთერაპიული კონცეფცია. ინოვაციური მიდგომა აერთიანებს მასპინძლობისა და ფსიქიკური ჯანმრთელობის სერვისებს, რომლებიც ხელს უწყობს ემოციურ განტვირთვას, ფსიქოლოგიურ წონასწორობასა და შიდა ჰარმონიას.

აღსანიშნავია, რომ კომისიის წევრთა გადაწყვეტილებით კავკასიის საერთაშორისო უნივერსიტეტის სტუდენტებს კონფერენციაზე პირველი ადგილი მიენიჭათ.

ცნობისთვის, კონფერენციაზე განხილული თემები ეხებოდა მცირე და საშუალო ბიზნესის როლს ტურიზმის განვითარებაში, ახალი სამუშაო ადგილების შექმნასა და ადგილობრივი ეკონომიკის გაძლიერებაში, ასევე, კერძო და საჯარო სექტორის თანამშრომლობას და სხვა.