2-13 ივნისს ბელგიის ქალაქ ბრიუსელში სამეცნიერო ვიზიტით იმყოფებოდნენ კავკასიის საერთაშორისო უნივერსიტეტის წარმომადგენლები - გლობალური პოლიტიკისა და უსაფრთხოების კვლევების ინგლისურენოვანი სამაგისტრო პროგრამის ხელმძღვანელი, საერთაშორისო ურთიერთობებისა და საერთაშორისო უსაფრთხოების ქართულენოვანი სამაგისტრო პროგრამის ხელმძღვანელი, პროფესორი ვახტანგ მაისაია და ასოცირებული პროფესორი ეკა ბერაია.
ვიზიტის მთავარი მიზანი იყო ქართველი მკვლევარების მონაწილეობა „უსაფრთხოების კვლევების მეორე მსოფლიო კონფერენციაში“, რომელიც ACAVENT-ის ორგანიზებით გაიმართა. აღნიშნული კონფერენცია აერთიანებს დარგობრივ მკვლევარებს, მეცნიერებსა და ანალიტიკური წრეების წარმომადგენლებს 20-ზე მეტი ქვეყნიდან. კონფერენციის მსვლელობაში დისტანციურად მონაწილეობდა CIU-ს საერთაშორისო ურთიერთობების საბაკალავრო პროგრამის ხელმძღვანელი, ასოცირებული პროფესორი ალიკა გუჩუა. ქართველი მკვლევარების მოხსენები ეხებოდა უსაფრთხოებისა და სამხედრო კვლევების აქტუალურ საკითხებს. ვახტანგ მაისაიამ და ალიკა გუჩუამ მოხსენება წარადგინეს თემაზე „ბიოლოგიური და ქიმიური ტერორიზმი როგორც სტრატეგიული ასიმეტრიული საფრთხე თანამედროვე საერთშორისო უსაფრთხოებისთვის“, ხოლო ეკა ბერაიამ, პოლიტიკის მეცნიერების დოქტორანტ ანტონ ქუთათელაძის თანაავტორობით, წარადგინა მოხსენება თემაზე „ტოტალური თავდაცვის კონცეფციის მნიშვნელობა საქართველოს უსაფრთხოების და სტაბილურობის მიღწევის საქმეში“.
მოხსენებების დასრულების შემდეგ, კონფერენციის ფარგლებში გაიმართა დისკუსია, რომელიც მონაწილეებს საშუალებას აძლევდა განეხილათ წარმოდგენილი თემები და გაეზიარებინათ საკუთარ გამოცდილება. ამავე კონტექსტში, ვახტანგ მაისაიამ წარადგინა მისი ხელმძღვანელობით მოქმედი სამაგისტრო პროგრამა „გლობალური პოლიტიკისა და უსაფრთხოების კვლევები“, რომელიც უნიკალურია თავისი შინაარსითა და მიზნობრიობით.
პროგრამა შემუშავებულია ევროკავშირის და „მეცნიერებისა და ტექნოლოგიების საერთაშორისო ცენტრის“ მხარდაჭერით, კავკასიის საერთაშორისო უნივერსიტეტის აკადემიური წრეების მონაწილეობით. მისი ძირითადი სპეციალიზაციაა მასობრივი განადგურების იარაღის გაუვრცელებლობის პოლიტიკა. სწორედ ამ პროგრამის საფუძველზე, საქართველოს აკადემიურ სივრცეში პირველად ოფიციალურად ჩამოყალიბდა ახალი სამეცნიერო მიმართულება - „უსაფრთხოების კვლევები“, რომელიც ამ ეტაპზე წარმოდგენილია სამაგისტრო დონეზე.
უსაფრთხოების კვლევების საერთაშორისო ასოციაციის აღმასრულებელმა დირექტორმა, ინესა ვიდასმა, მაღალი შეფასება მისცა პროგრამის არსებულ მოდელს და გამოთქვა მზადყოფნა, ასოციაციისა და მისი წევრების აქტიური ჩართულობისთვის მის განვითარებაში. გარდა ამისა, დაგეგმილია ერთობლივი სპეციალური ტრეინინგებისა და სემინარების ჩატარება აღნიშნული პროგრამის ფარგლებში.
პროგრამამ დიდი დაინტერესება გამოიწვია საერთაშორისო აუდიტორიაში - თურქეთის, იტალიის, იაპონიისა და დიდი ბრიტანეთის წარმომადგენლებმა გამოთქვეს მზაობა სამომავლო თანამშრომლობისთვის. CIU-ს ასოცირებული პროფესორი ეკა ბერაია მიწვეულია 2025 წლის ნოემბერში, დიდ ბრიტანეთში, ჰიბრიდული ომის სასწავლო კურსის წასაკითხად, რაც კიდევ ერთხელ უსვამს ხაზს აღნიშნული პროგრამის მნიშვნელობასა და საერთაშორისო რეზონანსს.
ვიზიტის ფარგლებში, 4 ივნისს, ქალაქ ბრიუგეში შედგა ქართველი მკვლევარების ვიზიტი ევროპის კოლეჯში, რომელიც წარმოადგენს ერთ-ერთ ყველაზე პრესტიჟულ სასწავლო დაწესებულებას ევროპის მასშტაბით. გაიმართა ქართველი მკვლევარების შეხვედრა კოლეჯის ხელმძღვანელობასა და აკადემიური პერსონალთან, სადაც დაისახა ერთობლივი თანამშრომლობის გეგმები. ამ შეხვედრის ფარგლებშიც, ასევე მოხდა „გლობალური პოლიტიკისა და უსაფრთხოების კვლევების“ სამაგისტრო პროგრამის წარდგენა, მომდევნო დღეს კი ქართველ პროფესორებს ჰქონდათ ორმხრივი შეხვედრები ევროკავშირის, ნატოს გაერთიანებული სარდლობისა და ევროპარლამენტის წარმომადგენლებთან ბრიუსელში.
ადრესატი
თქვენი სახელი
ელ-ფოსტა
თემა
შეტყობინება
